lunes, 21 de marzo de 2016

“A balsa de madeira”


No día Mundial da Poesía un poema do libro "Cartafol de Néboas" titulado "A balsa de madeira".



Sempre  soñei con construir
unha balsa de madeira e neumáticos
e baixar polo río Grande
coas troitas danzando,
mentres eu avanzaba,
nas mansas augas douradas polo sol.


Pero quedei sentado na beira,
para sempre, cos pés mollados
e unha canción de Creedence
apousada nos beizos,
cunha gamela xubilada
e os restos dun barco destruido.


E quedei sentado na beira
pisando esqueletes de cangrexo,
plásticos bastardos,
mirando a procesión do río
para convertirse en mar,
coma os nenos de pantalóns curtos
nadando ata océanos de adolescencia.


Observando muiños sen voz
e a vella ponte con cemento na alma,
e sangue de pedra,
buscando unha razón que me aliviara

da roda quente do progreso.

No hay comentarios:

Publicar un comentario

h